ԱԺ «Ժառանգություն» խմբակցության պատգամավոր Զարուհի Փոստանջյանը դիմել է ՀՀ մշակույթի նախարարություն՝ հորդորելով հայտ ներկայացնել ՅՈՒՆԵՍԿՕ՝ Արարատ լեռը հայ ժողովրդի մշակութային ժառանգություն ճանաչելու վերաբերյալ:
«Մենք մեր ժառանգությանը պետք է տեր կանգնենք և այս տարի առավել ևս պետք է այդ գործընթանցն իրականություն դառնա»,- ասաց Զ.Փոստանջյանը:
Մշակույթի նախարար Հասմիկ Պողոսյանը պատասխանեց, որ ոչ նյութական ժառանգության կոնվենցիան անդրադառնում է միայն ոչ նյութական արժեքներին՝ ավանդույթներ, կենսավարություն և դրանց շուրջ ձևավորվող միջավայրին: Այստեղ բնության, պատմամշակութային հուշարձանները որևէ ձևով սուբյեկտ չեն կարող դառնալ: Հավանաբար Դուք նկատի ունեք հուշարձանների պահպանության կոնվենցիան: Այնտեղ կա դրույթ, որ երկիրը կարող է ներկայացնել միայն իր տարածքում այդ պահին գտնվող հուշարձանները:
«Եթե մի արժեք այսօր պաշտպանված է, Արարատ լեռն է: Այն ոչ կարելի է քանդել, ոչ փչացնել, ոչ վտանգել: Իսկ աշխարհում որպես հայկական ժառանգություն՝ այն հանրահռչակված է»,-ասաց նախարարը:
Պատգամավորին չգոհացրեց նախարարի պատասխանը: Նա նշեց, որ այս կերպ է ներառվել օրինակ Ֆուձիյամա լեռը:
«Նման պատասխանով Դուք ինձանից չեք ազատվի»,-հայտարարեց Զ.Փոստանջյանը
