Ինչպես արդեն տեղեկացրել ենք՝ այսօր Երևանի Գ. Հովսեփյան փողոցի տներից մեկի դարպասից նկատվել է կախված նռնակ: Տան սեփականատեր, «Բագրատ տուր» տուրիստական գործակալության և «Ալաշկերտ» ֆուտբոլային ակումբի սեփականատեր Բագրատ Նավոյանը նշում է, որ ինքը չգիտի, թե ով և ինչու կարող էր նման բան անել և որևէ մեկին չի կասկածում:
«Ես թշնամիներ չունեմ, համոզված եմ, որ սա թշնամական բան չի, բայց թե ով և ինչի համար է նման բան արել ինձ էլ է հետաքրքրում»,-Asekose.am-ի թղթակցի հետ զրույցում նշեց Բագրատ Նավոյանը:
Վերջինս մեզ տեղեկացրեց նաև, որ նռնակը նկատել է տան պահակը և դիմել են ոստիկանություն, մնացածը արդեն կպարզի քննությունը:
Հիշեցնենք, որ դեպքը տեղի է ունեցել հունվարի 20-ին, ժամը 06.57-ին: Դեպքի վայր են մեկնել հատուկ նշանակության փրկարարական աշխատանքների իրականացման կենտրոնի հերթապահ, ՃԿԿ օպերատիվ խմբերը և մեկ մարտական հաշվարկ:Պարզվել է, որ Նորքի այգիներ փողոցի տներից մեկի դռան փականից կախված է Ֆ-1 տիպի մարտական նռնակ:
Փրկարարները վնասազերծել են նռնակը և հանձնել ոստիկանության աշխատակիցներին:
Հեղինակ՝ Անի Միրաքյան
