«Օդակաթիլային վարակների առումով ՀՀ-ում համաճարակային իրավիճակը համեմատաբար հանգիստ է: Նախորդ շաբաթվա ընթացքում սուր շնչառական վիրուսային վարակների 2354 դեպք է արձանագրվել»,-այսօր՝ լրագրողների հետ հանդիպման ժամանակ ասաց Առողջապահության նախարարության հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ Լիլիթ Ավետիսյանը:
Նրա խոսքով՝ հիվանդության դեմ պայքարելու համար մենք պետք է իմանանք դրա տարածման մեխանիզմը:
«Խոսքը օդում տարածվող կաթիլների մասին է: Երբ փակ տարածքում, որտեղ չկա օդափոխություն և մեծ թվով մարդիկ են, ապա հազալու ընթացքում կաթիլները որոշ ժամանակ կմնան օդում, ապա շնչելու միջոցով կանցնեն առողջ մարդու օրգանիզմ:
Պետք է խուսափել նաև ձեռքով բերանը փակելուց: Կարելի է միանվագ օգտագործման անձեռոցիկով փակել բերանը, հազալ ու նետել, կամ արմնկային մասով կարելի է անել: Չպետք է մոռանալ ձեռքերը հաճախ լվանալու մասին: Ամենակարևորը՝ հիվանդ ժամանակ պետք չէ դուրս գալ տանից: Գործատուները չպետք է ստիպեն մարդուն, որ հիվանդ ժամանակ գա աշխատանքի: Պետք է ըմբռնումով մոտենալ»,-ասաց Լիլիթ Ավետիսյանը:
ԱՆ հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալը կարևորում է այս սեզոնին լավ սնվելը՝ դիմադրողականությունը բարձրացնելու համար:
Asekose.am-ի թղթակցի այն հարցին, թե ժողովրդի մեջ տարածված է, որ այս ժամանակահատվածում տարածված գրիպը 2 շաբաթում է անցնում, Լիլիթ Ավետիսյանը պատասխանեց.
«Դա կախված է օրգանիզմից: Միևնույն է, մարդը պետք է ունենա բարձր ջերմություն, գլխացավ, թուլություն և այլն: Իսկ, եթե օրգանիզմի դիմադրողականությունը բարձր է, մարդն ավելի շուտ է առողջանում»:
Անի Կարապետյան