«Անտառների հասարակական մոնիտորինգ» ծրագրի շրջանակներում իրականացված առաջին դաշտային աշխատանքների արդյունքում Համահայկական բնապահպանական ճակատ (ՀԲՃ) քաղաքացիական նախաձեռնության կամավորների խումբը՝ «Հայանտառ» ՊՈԱԿ-ի Դսեղի անտառտնտեսության մի քանի տեղամասերի տարածքում հայտնաբերել է մոտ 600 տարբեր տեսակի անօրինական հատված ծառ.
«Երբ այնտեղ էինք՝ 3 տարբեր ուղղություններից աշխատում էին էլեկտրական սղոցներ ու անընդհատ լսվում էին ընկնող ծառերի ձայներըը, որոնցից դատելով՝ բավականին հսկա ծառեր էին»,-այսօր՝ լրագրողների հետ հանդիպման ժամանակ ասաց ՀԲՃ համակարգող խմբի անդամ Անի Խաչատրյանը՝ հավելելով.
«Անտառում ամենուրեք մնացած կոճղերն ունեին 10-ից մինչև 90 սմ տրամագիծ։ 350-ը թարմ հատված էին, իսկ մնացածը՝ մինչև 5 տարվա վաղեմության էին։ Այդ փայտերի մեծ մասը չէր օգտագործվել: Այսինքն, վառելիքի խնդիր չէ, որ լուծում են: Հնարավոր է՝ որպես շինանյութ են օգտագործում»:
ՀԲՃ համակարգող խմբի անդամ Լևոն Գալստյանը նկատում է՝ «Մեր երկիրը մեր տակից տանում են: Կատարվածը պետք չէ ջարդել գյուղացիների գլխին: Խնդիրը համակարգային է և պետք է գտնել հիմնական մեղավորներին»:
Նշենք, որ Համահայկական Բնապահպանական Ճակատի համակարգող խմբի անդամները փաստեր ներկայացնող լուսանկարներ և տեսագրություններ ունեն, որոնք ներկայացրել են համապատասխան մարմիններին:
Անի Կարապետյան