Անցած տարվա դեկտեմբերին Հայաստանում ռուսական ռազմաբազան համալրվեց տասնյակ նոր մարտական և տրանսպորտային ուղղաթիռներով, իսկ այս տարվա սկզբին Ռուսաստանը հայտարարեց, որ 2016-ի երկրորդ կեսին ռազմակայանում ՄիԳ-29 արդիական կործանիչների նոր խմբաքանակ, ինչպես նաև ևս մեկ տրանսպորտային ուղղաթիռ է տեղակայելու:
Գերագույն խորհրդի նախկին պատգամավոր Ազատ Արշակյանը հույս ունի, որ 1917-1918թթ. նման Ռուսաստանը կհեռանա ու զենք-զինամթերքը կթողնի հայկական բանակին.
«Հույս ունեմ, որ դա երրորդ անգամ կկրկնվի: Ինչքան շատ բերեն ու զենքը լավ լինի, այնքան մեր օգտին է, որովհետև ես չեմ կարծում, որ Ռուսաստանը ՆԱՏՕ-ի դեմ կարող է պատերազմ սկսել: Այսօրվա Թուրքիան դա ՆԱՏՕ-ն է»:
ԱԱԾ նախկին պետի տեղակալ Գուրգեն Եղիազարյանն էլ կարևորելով զենքի տրմադրման հանգամանքը նկատեց.
«Մեր հարևանին ես միշտ նմանեցրել եմ գյուրզայի հետ, բայց մեկ տարբերությամբ.գյուրզան կծելուց առաջ զգուշացնում է: ՆԱՏՕ-ի անդամ հանդիսանալով հանդերձ՝ նա այսօր սրիկայաբար մտել է Իրաքի տարածք ու դուրս չի գալիս: Ոչ մի ձայն չկա: Այնպես որ՝ Ռուսաստանի ներկայությունն Արաքսի ափին շատ կարևոր է, քանի որ չգիտենք՝ ինչպես Թուրքիան կվարվի Հայաստանի հետ: Այս երկիրը ցանկանում է նաև «քիթը մտցնել» Արցախի գործընթացի մեջ ու Հարավային Կովկասում իշխող դառնալ»:
Անի Կարապետյան
