Մայրաքաղաքի փողոցներում խցանումներից խուսափելու համար Կառավարությունը վերջերս փոփոխություն կատարեց ԱՊՊԱ համակարգում՝ ավտոճանապարհային պատահարների կողմերի համար հայտարարագրի նոր ձև ներկայացնելով։
Սա պատահարի մասնակից վարորդներին հնարավորություն կտա չսպասել ԱՊՊԱ-ի աշխատակիցներին ու դեպքի վայրից հեռանալ՝ լրացնելով համապատասխան հայտարարագրի ձևը, ինչպես նաև լուսանկարահանել պատահարի մանրամասները: Փոփոխությունը, սակայն, ոչ բոլոր պատահարներին է վերաբերում, խոսքն առայժմ մինչև հիսուն հազար դրամ վնասի մասին է:
Ավելին, յուրքանչյուրն իր մեքենայում պետք է ունենա նոր համաձայնեցված հայտարարագիրը, որը կարելի է ձեռք բերել թե՛ համացանցից, թե՛ ավտոապահովագրող ընկերություններից: Բացի այդ՝ վարորդները պետք է նաև լուսանկարելու հմտություններ ունենան: Համաձայնության չգալու դեպքում գործելու է ներկայիս կարգը. խնդիրը կլուծվի ՃՈ և ԱՊՊԱ-ի գործակալի միջոցով: Հին կարգը գործելու է նաև, եթե պարզվել է, որ արտաքին վնասվածքից բացի մեքենա ներքին կամ թաքնված վնասվածքներ նույնպես ունի:
Վարորդ Պողոս Օղլուկյանի կարծիքով այս փոփոխություններն անհեթեթ են և «կեղտոտ» գործունեությունը թաքցնելու համար են.
«Եթե մենք լինեինք եվրոպացու նման մտածող ազգ, ես համաձայն կլինեի այդ օրենքի հետ: Բայց այսօր մեր հայերը մեծամասամբ գիտունիկներ են: Մեր ազգի մենթալիտետն իմանալով՝ երբեք հնարավոր չէ, որ 2 վարորդ որոշեն, թե վնասի չափը 50.000 դրամը գերազանցում է, թե ոչ: Պարտադիր կլինեն վեճեր, խցանումները չեն վերանա: Երևի այդ մարդիկ փոքր ժամանակ հեծանիվ չեն վարել ու չգիտեն, ինչ է լինելու»,-ասաց վարորդը:
Անի Կարապետյան