Հունիսի 14-ին հայտնի բեմանկարիչ Լիդա Գևորգյանի ծննդյան 75-րդ տարեդարձն է. նրանից բացի ԽՍՀՄ-ում այդ մասնագիտությամբ աշխատել է միայն մեկ կին` ազգությամբ ռուս:
Լիդա Գևորգյանի մասնակցությամբ ստեղծված ֆիլմերը հայկական կինոարտադրության լավագույն նմուշներն են համարվում`«Նահապետ», «Ատամնաբույժն արևելյան», «Լռության սիմֆոնիա», «Կտոր մը երկինք», «Մայրական տուն», «Ճերմակ անուրջներ», «Ծաղրածուի ժպիտը», «Ախթամար», «Ավդոյի ավտոմեքենան», «Տերը», «Ուր էիր, մարդ Աստծո» …
Լիդա Գևորգյանի մուտքը կինոարտադրության ասպարեզ շատ պատահական է ստացվել:
Նա ավարտել է գեղարվեստաթատերական ինստիտուտի նկարչական բաժինը, այնուհետև` դիպլոմային պաշտպանության ժամանակ առաջարկ է ստացել «Արմենֆիլմ» ընկերության կողմից` աշխատելու «Ավդոյի ավտոմեքենան» ֆիլմում` որպես նկարչի օգնական:
Այնուհետեւ, ամուսնանալով հայտնի կինոռեժիսոր Էռնեստ Մարտիրոսյանի հետ, Լիդա Գևորգյանը սկսել է իր ամուսնու հեղինակած ֆիլմերում աշխատել` որպես բեմադրող նկարիչ:
Սակայն մինչ ամուսանալը, Լիդա Գևորգյանի կյանքում հետաքրքիր դեպք է տեղի ունեցել, որի մասին շատ քչերը գիտեն:
Բեմադրող նկարչի և Լիբիայի գահընկեց արված ու դաժան մահվան արժանացած առաջնորդ Մուամմար Կադաֆիի միջև ռոմանտիկ կապ է եղել:
Նրանք միմյանց հանդիպել են Մոսկվայում` համերգներից մեկի ժամանակ:Կադաֆին ուսանել է Մոսկվայում, իսկ Լիդա Գևորգյանը մասնակցում էր հերթական նկարահանումներին:
Բեմանկարչի օծանելիքի բույրն այնքան է դուր եկել Կադաֆիին, որ վերջինս որոշել է զրույցի բռնվել բեմանկարչի հետ:
Զրույցի ընթացքում Կադաֆին, իմանալով, որ Լիդա Գևորգյանը նկարիչ-բեմադրող է, խաբում եւ ներկայանում է նրան որպես լրագրող` պատրաստակամություն հայտնելով վերջինիս մասին հոդված պատրաստել:
Asekose.am –ի հետ զրույցում Լիդա Գևորգյանն ասաց, որ շուրջ երկու տարի տևած նամակագրությունը դադարել է այն ժամանակ, երբ ինքը որոշել է ամուսնանալ Էռնեստ Մարտիրոսյանի հետ:
Լիդայի և Էռնեստի սիրո արդյունքը նրանց զավակներն են` որդին և դուստրը` հայտնի ու տաղանդավոր ռեժիսոր Լուսինե Մարտիրոսյանը:
Լիդա Գևորգյանը, հիմա, թերևս ամենաշատը կարոտում է թոռնուհուն ` արդեն տևական ժամանակ Միացյալ Նահանգներում ապրող երգչուհի և դերասանուհի Էյնջելին:
