Օրերս Ալ. Սպենդիարյանի անվան օպերայի և բալետի ազգային ակադեմիական թատրոնում հայ երգիչ-երգչուհիները կատարում էին Ազնավուրի երգերը: Սա, թերևս, մեծն շանսոնյեի մահից հետո նրան նվիրված առաջին երեկոն էր Երևանում: Asekose.am-ի հետ զրույցում այս համերգային ծրագրերի ղեկավար երգիչ, դերասան Հայկ Պետրոսյանը նշեց, որ երեկոն նախապես էր ծրագրված, ավելին՝ ակնկալում էին, որ Շառլ Ազնավուրը պետք է նույնպես ներկա լիներ համերգին, քանի որ տվյալ օրերը համընկել էին Երևանում Ֆրանկոֆոնիայի օրերի հետ, որին շանսոնյեն պետք է ներկա լիներ:
Այնպես ստացվեց, որ Շառլ Ազնավուրին նվիրված համերգային ծրագիրը դարձավ նաև հուշ-երեկո: Իսկ Հայկ Պետրոսյանը համերգային ծրագրերի ընթացքում նաև երգեր էր կատարում և ներկայացնում հետաքրքիր դրվագներ Ազնավուրի կյանքից:
«Հատուկ շնորհակալություն եմ ցանկանում հայտնել իմ ընկեր-երաժիշտներին, որոնց հետ 2016թ.-ից սկսեցինք Ազնավուրի երգերը ներկայացնել, ինչը հետագայում դարձավ մեծ նախագիծ: Առաջինը հենց նրանց եմ շնորհակալություն հայտնում, որովհետեւ առանց նրանց պարզապես չէի կարող բարձրանալ բեմ և կատարել Ազնավուր: Շնորհակալություն եմ հայտնում նախորդ տարվա համերգի կայացման գործում մեծ ներդրում ունեցած մարդկանց՝ Հայաստանի ազգային ֆիլհարմոնիկ նվագախմբին՝ հանձինս Էդուարդ Թոփչյանի և Ռուզաննա Սիրունյանի, արդեն Մշակույթի նախկին նախարար Արմեն Ամիրյանին, և, իհարկե, այս տարվա աջակիցներին՝ երաժիշտներին, Մշակույթի նախարարությանը՝ Լիլիթ Մակունցի գլխավորությամբ, Unity Production-ին, Ինեկոբանկին և բոլոր այն մարդկանց, ովքեր ներդրում են ունեցել այս մեծ նախագծի կայացման գործում»,-ասաց Հայկը:
Մեզ հետ զրույցում Հայկը նշեց նաև, որ իր համար շատ պատասխանատու էր հոր՝ Վարդան Պետրոսյանի վերադարձը:
«Առհասարակ, իմ կյանքում Շառլ Ազնավուրը մեծ դեր է ունեցել: Շատ կարևոր էր, որ 5 տարի անց հայրս երևանյան բեմ վերադարձավ հենց Շառլ Ազնավուրին նվիրված համերգային ծրագրով: Նա հենց այնպես պարզապես չէր կարող վերադառնալ: Ինձ համար երկակի զագցողություններ էին, քանի որ շատ ուրախ էի հորս վերադարձի համար՝ նաև որպես հանդիսատես: Իսկ երբ նա բեմ բարձրացավ, և բոլորը ոտքի կանգնեցին, իսկապես հուզիչ տեսարան էր»:
Հայկի խոսքով՝ այդ տեսարանն իրեն հիշեցրեց այն դրվագը, երբ Խորեն Աբրահամյանը դադարից հետո ԱՄՆ-ից վերադարձել էր և Վարդան Պետրոսյանի հետ ներկայացել «Ծերունին և սովը» ներկայացումով:
«Բացի դրանից, մենք այս համերգային ծրագրում ներկայացել էինք երիտասարդ երգիչ-երգչուհիներով, իսկ հայրս այս առումով մեզ համար թիկունք էր: Նա ասաց, որ բավական մեծ աշխատանք էին կատարել»:
Հարկ է նշել, որ Ազնավուրին նվիրված համերգային ծրագրերից անմիջապես հետո՝ նոյեմբերի 12-ին, Հ. Պարոնյանի անվան երաժշտական կոմեդիային թատրոնում Հայկ Պետրոսյանը ներկայացնելու է իր «Ամեն ինչ ԼԱՅՎ Ա լինելու-Update» stand up ներկայացումը: Ըստ Հայկի՝ երկրում տեղի ունեցող իրադարձություններն այնքան արագ են զարգանում, որ պարբերաբար պետք է ներկայացման մեջ փոփոխություններ կատարի, բացի դրանից՝ ժանրի առանձնահատկություններից մեկն էլ այն է, որ ներկայացումը չի կարող ժամանակավրեպ լինել:
«Հիմքը, իհարկե, հեղափոխությունն է, սակայն փոփոխություններն այնքան շատ են, որ նույնիսկ ներկայացմանը դիտելու եկած Արարատ Միրզոյանը զարմացած ասել էր՝ փաստորեն այսքան բան է եղե՞լ: Իսկապես փոփոխությունները շատ են, ես էլ դրանք ներկայացնում եմ բեմից»:
Հայկը նշեց նաև, որ այս stand up-ով ավելի վաղ չէր կարող ներկայանալ.
«Ամեն ինչ իր ժամանակն ունի: Նմանեցնում եմ այն տեսարանին, երբ ավելի փոքր տարիքում ինչքան էլ ցանկանաս կիսվել օրինակ՝ մորդ հետ չես կարող, դրա համար հասունանալ և ժամանակ է պետք»:
Հեղինակ՝ Լիլիթ Հակոբյան
Կարդացեք նաև՝
Եղել են դժվար պահեր, երբ ցանկացել եմ կոտրվել, հանձնվել, բայց հիշել եմ Ազնավուրին... Հայկ Պետրոսյան
ԱԱԾ-ից մինչև ՀՔԾ, գաղտնալսումից մինչև Ռոբերտ Քոչարյանի վերադարձ. Հայկ Պետրոսյանը մանրամասնում է
«Իր հեռանալով Շառլն ինձ վերադարձրեց հայկական բեմ». Վարդան Պետրոսյան
Քաղաքականությունը մարդկանց դարձնում է միմյանց գզելու պատրաստ կատաղած շներ. Վարդան Պետրոսյան
